2008 жылы Елбасының қатысуымен 112 кездесу және іс-шара өтті
АСТАНА. Қаңтардың 13-і. ҚазАқпарат – Өткен 2008 жылы Елбасы Нұрсұлтан Назарбаевтың қатысуымен жалпы алғанда 112 кездесу мен халықаралық мазмұндағы іс-шаралар өтті. Оның ішінде, Елбасы екіжақты қарым-қатынас аясында шетелге 6 іссапарға шығып, 11 көпжақты саммит пен 8 халықаралық форумға қатысты,
деп хабарлайды ҚазАқпарат ресми бұқаралық ақпарат құралдарына сілтеме жасап. Н.Назарбаев 13 баспасөз мәслихатын және 15 брифинг өткізді, шетелдік және отандық 20 жетекші бұқаралық ақпарат құралына сұхбат берді. Сондай-ақ Елбасы 2700-ден астам құжаттарды қарап, қол қойды, олардың қатарында 102 заң, 215 жарлық, 115 өкім, 22 мәжіліс хаттамалары, 2000-ға тарта қызметтік құжаттар, талдамалық және ақпараттық-анықтамалық материалдар, 84 Алғыс хаттар, азаматтардың 179 арыз-шағымдары бар, соңғы аталғандардың 106-сы бақылауға алынды. Осы кезеңде Мемлекет басшысы 59 күн сапарларда болды, оның 20 күні шет елдерге, 39 күні Қазақстанның өңірлеріне арналды.
