2012 жылы Электрондық үкімет порталында 100-ден аса қызмет түрі жүзеге асады - Байланыс және ақпарат министрі
АСТАНА. 6 желтоқсан. ҚазАқпарат /Қанат Мәметқазыұлы/ - 2012 жылы Электрондық үкімет порталында 100-ден аса қызмет түрлері жүзеге асады. Бұл туралы бүгін ҚР Парламенті Мәжілісінде ақпараттық-коммуникациялық технологияларды дамыту тақырыбында өткен Үкімет сағатында Байланыс және ақпарат министрі Асқар Жұмағалиев мәлім етті.
«Ағымдағы жыл басында Электрондық үкімет порталы арқылы 18 мың анықтамалар берілген болса, бүгінгі күні бұндай жолмен берілген анықтамалар саны 1 млн. 300 мыңға дейін жетіп отыр. Жалпы, 2010 жылы электрондық лицензияларды беру басталып, қазіргі уақытта бұлардың саны 100-ге жетті. Бұдан бөлек, 2009 жылы Электрондық үкімет порталында 59 электрондық қызмет пен сервистер болса, 2010 жылдың аяғына дейін бұл көрсеткішті 74-ке дейін арттырамыз», - деді А. Жұмағалиев.
Министрдің айтуынша, жыл сайын қазақстандықтар үшін ұсынылатын электрондық қызметтер саны ұлғая түспек. «Нәтижесінде, 2011 жылы 15 жаңа электрондық қызметтерді енгізіп, 2012 жылы олардың санын 100-ден асыратын боламыз», - деді А. Жұмағалиев.
