2013 жылдан бастап лиценциялардың барлық түрлері электрондық үлгіде болады - салық инспекторы Оксана Жансейітова

АЛМАТЫ. 22 қазан. ҚазАқпарат - Мемлекеттік органдардың қызметіне жүгіну кезінде құқықтық мағлұматының аздығынан қаржысын ғана емес құнды уақытын да зая кетіріп жүргендер әлі азаймай тұр.

Алматы қалалық салық департаментінің алкогольдік және акциздік өнімдерді әкімшілендіру бөлімінің жетекші салық инспекторы Оксана Жансейітованың айтуынша, өз құқығын жетік білмеудің салдарынан сенім хат арқылы делдалдардың көмегіне жүгінушілер көп. Олардың арасында өздеріне сенім білдірген азаматтардың ғана емес мемлекеттік қызмет мекемелерінің қызметкерлерінің және онда кезекте тұрған өзге азаматтардың да уақытын алатындар бар.

Елбасының халыққа арнаған биылғы Жолдауында: «2012 жылдың аяғына дейін әлеу­меттік маңызы бар мемлекеттік қызмет­тердің 60 пайызы, соның ішінде лицензиялардың барлық түрлері, тек қана элек­тронды түрде болуға тиіс. 2013 жылдан бастап мемлекеттен барлық рұқсат етушілік құжаттарды да қазақстандықтар электронды түрде немесе Халыққа қызмет көрсету орта­лық­тары арқылы алуға тиіс», - деген болатын.

Оксана Олегқызының сөзіне қарағанда, лицензия алуда кәсіпкерлерге делдалдардың еш қажеті жоқ. Биыл алкогольді өнімдерге лицензия беру кезінде талап етілетін құжаттар саны азайтылып, бұл рәсім айтарлықтай жеңілдетілді. Жеке және заңды тұлғаларға қойылатын талап бірдей. Мәселен  жеке кәсіпкерге оның есепте тұрғаны туралы куәлігі, салық төлеу нөмірі, жеке куәлігі, кассалық аппаратының тіркеу карточкасы мен егер нысанды жалға алатын болса бұл келісімнің көшірмесі қажет.