2015 жылы Астанадағы ЖЭО-3 бірінші кезегі пайдалануға беріледі - И.Тасмағамбетов
АСТАНА. 11 сәуір. ҚазАқпарат - 2015 жылдың тамызында елорданың 3-інші Жылу энергия орталығының бірінші кезегі пайдалануға беріледі.
Бұл туралы бүгін Елбасы Н.Назарбаевтың қатысуымен өтіп жатқан елорданың әрі қарай дамуы мәселеріне арналған кеңес барысында Астана қаласының әкімі Иманғали Тасмағамбетов мәлім етті.
«Қала үшін ЖЭО-3, жаңа энергия көзінің құрылысы стратегиялық маңызға ие. Қазіргі таңда бұл жобаның алғашқы кезеңі жүзеге асырылуда. Оны 2015 жылы толығымен аяқтау көзделген», - деді ол.
Қала басшысының атап өтуінше, сонымен қатар ЖЭО-1 мен ЖЭО-2 энергия көздерін қайта жаңғырту және кеңейту бойынша жұмыстар жүргізілуде. Жалпы бүгінде қаланың жылу тұтыну көлемі 1675 Гкал/ сағат болса, оның тапшылығы 301 Гкал/сағатты құрап отыр.
«2012 жылы ЖЭО-2-нің қуаттылығы 480 Гкал/сағат болатын 4 қазандық құрылғысы іске қосылғаннан кейін жылу энергиясының тапшылығы жойылып, резерв 44м Гкал/сағатты құрайтын болады», - деді И.Тасмағамбетов.
