2016 жылы біліктілігін арттырған ұстаздар саны 73 мыңнан асып жығылады

АСТАНА. ҚазАқпарат - 2016 жылы Қазақстанда біліктілігін арттырған ұстаздар саны 73 мыңнан асып жығылатын болады. Бұл туралы бүгін білім беру қызметкерлерінің республикалық тамыз кеңесінде ҚР Премьер-Министрінің орынбасары Гүлшара Әбдіқалықова айтты.

«Педагогтерді кәсіби тұрғыда дамыту үшін біліктілік арттыру орталықтары құрылды. Педагог кадрларды дайындау және біліктіліктерін артыру жүйесі жетілдірілді. Кембридж университетімен бірлесіп, біліктілік арттырудың 3 деңгейлі жүйесі енгізілді», - деді Г.Әбдіқалықова.

Вице-премьердің атап өтуінше, 2012-2014 жылдар аралығына 150 мың адам қысқа мерзімді курстан, 39 мың адам үш айлық курстан өткен. Соның нәтижесінде аталған ұстаздардың жалақылары 30-дан 100 пайызға дейін өскен.

«2014 жылдың соңына дейін - 9 770, 2015 жылы - 16 592, 2016 жылы - 16 590 педагогті оқыту жоспарлануда. Нәтижесінде 2016 жылы 73 123 оқытушы білім алады», - деді ол.