2017 жылы теміржол көлігімен 87 млн тонна жүк тасымалданды
АСТАНА. ҚазАқпарат - Көлік кешеніндегі нақты көлем индексі 103,4% құрады. Бұл туралы Үкімет отырысында жасаған баяндамасында ҚР Инвестициялар және даму министрі Жеңіс Қасымбек мәлім етті, деп хабарлайды ҚР ИДМ баспасөз қызметі.
«Жүк тасымалының көлемі 1,1% өсті және 813 млн. тоннаны құрады. Жүк айналымы 5,4% ұлғайды және 125 млрд. тонна км құрады. Өсімнің басым көпшілігі темір жол көлігімен тасымалданғаны байқалып отыр. Жүк тасымалы 15,7% өсті және 87 млн. тоннаны құрады. Ал, жүк айналымы 12,6% өсті және 60 млрд. тонна км құрады»,-деп атап өтті Жеңіс Қасымбек.
Құрылыс бойынша нақты көлем индексі 107,1% құрады. Министрдің айтуынша, Тұрғын үй құрылысына барлық қаржыландыру көздерінен 173,4 млрд. теңге бөлінді, өсім 13,8%. Жалпы ауданы 3,1 млн.шаршы метр тұрғын үй пайдалануға берілді. Бұл 2016 жылдың сәйкес кезеңімен салыстырғанда 125,3% құрап отыр.
Тұрғын үйдің басым көпшілігін - 2,9 млн. шаршы метрі немесе 93,2%-ын жұртшылық пен жеке құрылыс салушылар пайдалануға берді.
Мемлекеттік сектордың үлесіне пайдалануға берілген тұрғын үйдің жалпы ауданының 5% тиесілі.
Республика бойынша 25 230 баспана пайдалануға берілді. Оның 7 701-і - жеке баспана.
