2018 жылдың 1-тоқсанында Байқоңырдан екі зымыран ұшырылады

БАЙҚОҢЫР. ҚазАқпарат - «Роскосмос» мемлекеттік корпорациясының комиссиясы 2018 жылдың қаңтар-наурыз айларына арналған Байқоңыр ғарыш айлағынан ғарыш аппараттарының ұшу жоспарын әзірледі, деп хабарлайды «ҚазАқпарат» ХАА тілшісі Ресей ғарыш ведомствосының баспасөз қызметіне сілтеме жасап.

Халықаралық ғарыш стансасының (ХҒС) бағдарламасы бойынша 2018 жылдың алғашқы тоқсанында Байқоңырдан екі зымыран ұшыру жоспарланып отыр.

11 ақпан күні «Прогресс МС-08» көлік-жүк ғарыш кемесіне старт беріледі. 15 наурызда Байқоңырдан «Союз МС-08» басқарылатын көлік кемесі кезекті экспедицияны алып, ХҒС орбитасына шығады.

Бұдан тыс, «Роскосмос» Федералдық ғарыш бағдарламасына, коммерциялық бағдарламаларға сәйкес, 2018 жылғы қаңтар-наурыз айларында басқа ғарыш айлақтарынан тағы да екі зымыран ұшыруды жоспарлаған.

Ұшуы кейінге қалдырылған «Союз-2.1а» тасығыш зымыраны «Канопус-В» №3 және №4 аппараттарын алып, Восточный ғарыш айлағынан 1 ақпан күні ұшады.

1 наурызда Гвиана ғарыш орталығынан O3b F4 ғарыш аппараты тиелген «Союз СТ-Б» тасығыш зымыранына старт берілуі тиіс.