2019 жылы субсидияланатын әуе бағыттары бойынша конкурстың қорытындысы шықты

АСТАНА. ҚазАқпарат - Индустрия және инфрақұрылымдық даму министрлігінің Азаматтық авиация комитеті субсидияланатын әуе бағыттары бойынша биылғы конкурстың қорытындысын жариялады, деп хабарлайды ҚазАқпарат тілшісі комитеттің баспасөз қызметіне сілтеме жасап.

Халықтың әуе тасымалына қажеттілігін ішкі бағыттарда қанағаттандыру үшін елімізде 2002 жылдан бастап әуе бағыттарына субсидия бөлінеді. Субсидиялаудың негізгі мақсаты - Қазақстан Республикасының облыс орталықтары арасындағы әуе қатынасын қамтамасыз ету, сондай-ақ Қазақстан аумағында туристік бағыттарды дамыту.
«Осылайша, Қазақстан Республикасы Үкіметінің 2013 жылғы 31 қаңтардағы №69 қаулысымен бекітілгеніндей, субсидияланған әуе бағдарларына арналған конкурс ережесіне сәйкес, Қазақстан Республикасының Индустрия және инфрақұрылымдық даму министрлігінің Азаматтық авиация комитеті жыл сайын субсидияланатын әуе бағыттарына конкурс өткізеді», - делінген комитеттің хабарламасында.
Конкурс комиссиясының шешімі бойынша SCAT әуе компаниясы мынадай субсидияланған әуе бағыттары бойынша жеңімпаз деп танылған:
Қызылорда - Қарағанды - Қызылорда арасында аптасына кемінде екі рет (тариф 18 мың теңге), Өскемен - Қарағанды - Өскемен бағыты (тарифі 20 000 теңге), Шымкент - Петропавл - Шымкент аптасына кемінде 2 рет (тарифі 20 000 теңге), Астана - Үшарал - Астана бағыты бойынша аптасына кемінде 6 рет (тариф 16 000 теңге), Көкшетау-Ақтау-Көкшетау бағыты бойынша аптасына кемінде 2 рет (тариф 20 000 теңге), Көкшетау - Алматы-Көкшетау (18 000 теңге), Петропавл - Астана - Петропавл ағыты бойынша аптасына кемінде 2 (тариф 10 0 00 теңге), Петропавл - Алматы - Петропавл бағыты (20 000 теңге), Талдықорған - Астана - Талдықорған бағыты бойынша аптасына 7 рет (24 500 теңге), Үшарал - Алматы - Үшарал бағыты бойынша бағдарлар (10 000 теңге).
Ал «Оңтүстік аспан» АҚ әуе компаниясы мынадай бағыттар бойынша жеңімпаз атанған:
Алматы - Балқаш - Алматы (бір бағытта 14 000 теңге), Астана - Үржар - Астана (16 000 теңге), Үржар - Алматы - Үржар бағдары бойынша аптасына кемінде 4 рет (14 000 теңге), Астана - Балқаш - Астана бағыты бойынша аптасына кемінде 5 рет (тариф 9000 теңге), Өскемен-Семей-Үржар-Семей-Өскемен бағыты бойынша аптасына кемінде 2 рет (бұл жерде Өскемен-Семей бағыты 4 000 теңге, Өскемен - Үржар бағыты 10 000 теңге, Семей-Үржар бағыты 10 000 теңге, Зайсан-Өскемен аптасына кемінде 2 рет (бір бағытта 8 000 теңге).
Еске сала кетсек, Азаматтық авиация комитеті Қазақстанның туристік аймақтарына қатынайтын әуе бағыттарын субсидиялауға конкурсты өткен айдың басында жариялаған еді.