2020 жылға қарай Қазақстан арқылы өтетін транзит көлемі 2 есе артады - Ж. Қасымбек
АСТАНА. ҚазАқпарат - 2020 жылға қарай Қазақстан арқылы өтетін транзит көлемі 2 есе артады. Бұл туралы бүгін Орталық коммуникациялар қызметінде өткен брифингте ҚР Инвестициялар және даму министрлігінің бірінші вице-министрі Жеңіс Қасымбек мәлім етті.
«Қазақстан 2020 жылға қарай Орталық Азияның негізгі логистикалық операторы және екі алып нарық арасындағы негізгі транзиттеуші болады деп жоспарлап отырмыз. Сол кезде біздің еліміз арқылы өтетін транзит көлемі 2 есе артады», - деп атап өтті ол.
Бірінші вице-министрдің айтуынша, еліміздің темір жол саласы алдында 2020 жылға ақарай 6 мың шақырымға жуық теміржолды модернизациялау, инфрақұрылымды дамыту және транзиттік-көліктік әлеуетін арттыру міндеті тұр.
«Биылғы 22 тамызда жалпы ұзындығы 1250 шақырым Жезқазған-Бейнеу және Арқалық-Шұбаркөл теміржол учаскелері уақытша пайдалануға берілді. Осы жолдарда 3,5 мың жаңа жұмыс орындары ашылды. Қарағанды, Қызылорда, Ақтөбе, Маңғыстау және Қостанай облыстарында теміржол бойына 204 тұрғын үй, 2 мектеп және 3 балабақша салынады, әлеуметтік жағдай реттеледі», - дейді Ж. Қасымбек.
Оның атап өтуінше, аталған маршрутта 2018 жылға қарай 24 млн.тонна жүк тасымалданатын болады. Ал осы көрсеткіш 2020 жылға қарай 30 млн. тоннаға жеткізіледі.
