2020 жылы 12 мыңнан астам этникалық қазақ қандас мәртебесін алды
НҰР-СҰЛТАН. ҚазАқпарат - Ағымдағы жылғы 1 желтоқсандағы жағдай бойынша 12,3 мың адам тарихи Отанына оралып, қандас мәртебесін алды, деп хабарлайды ҚР Еңбек және халықты әлеуметтік қорғау министрлігінің баспасөз қызметі.
Жалпы, 1991 жылдан бері республикаға 1 млн 69,5 мың этникалық қазақ оралды.
Осы жылы Қазақстанға келген қандастардың жартысынан көбі (54,2%) Қытайдан, 30,0% – Өзбекстаннан, 8,9% – Түрікменстаннан, 3,7% – Моңғолиядан және 3,2% басқа елдерден.
Келген этникалық қазақтар негізінен Алматы (51,7%) және Маңғыстау (13,4%) Түркістан (5,6%) облыстарына, сондай-ақ Нұр-Сұлтан (4,1%) және Шымкент қалаларына (3,7%) қоныстанды.
11 айдың қорытындысы бойынша еңбекке қабілетті жастағы қоныс аударушылар саны 57,2%-ды, еңбекке қабілетті жастан кіші 32,2%-ды және зейнеткерлер 10,6%-ды құрайды.
