2023 жылы алматылықтар 400 мыңнан астам төлқұжат пен жеке куәлік алды

2023 жылы Азаматтарға арналған үкімет арқылы 2,6 миллионнан астам қазақстандық төлқұжат пен жеке куәлік алған, деп хабарлайды Kazinform.

Оның ішінде алматылықтар өткен жылы 400 мыңнан астам паспорт пен жеке куәлік алды.

«Алматы ХҚО-лары арқылы 427 303 шетелдік паспорттар мен жеке куәліктер берілді. Бұл ретте өткен жылы 5300 адам Медеу аудандық ХҚО-дағы құжаттау терминалдары арқылы өтінім берді. Терминалдар уақытты үнемдейді және бірнеше минут ішінде өтінім беруге мүмкіндік береді. Биыл Әуезов аудандық ХҚО-да да құжаттандыру бойынша терминалдар орнату жоспарлануда», — деді «Азаматтарға арналған үкімет» мемлекеттік корпорациясы Алматы қаласы филиалының директоры Абдурасул Кулдашов.

Айта кетейік, 2024 жылға келесідей мемлекеттік баж алымы белгіленді: ҚР азаматының 36 парақты төлқұжаты үшін — 8 АЕК, 48 парақты төлқұжат үшін — 12 АЕК, 24 парақты төлқұжат үшін (16 жасқа дейінгі балаларға) — 4 АЕК. Жеке куәлік үшін төлем 0,2 АЕК-ті құрайды.

Еске салсақ, өткен жылы төлқұжаттар мен жеке куәліктерді беру сұраныстағы мемлекеттік қызметтер қатарында болған.