2025 жылы Алматыдағы бейнекамералар саны 50 мыңға жетеді

АЛМАТЫ. KAZINFORM – Алматыда «Ақылды қала» бағыты аясында түрлі жобалар іске асырылып жатыр. Олардың қатарында – «Бірыңғай бейнемониторинг жүйесі», «Кешенді қауіпсіздік жүйесі» жобалары бар.

«Ақылды қала» жобасы аясында іске асырылып жатқан жұмыстарға сай 2024 жылы Алматы қаласындағы бейнекамералар санын 50 мыңға жеткізу көзделген. Биыл жыл соңына дейін 3 000 камера орнату жоспарланған. Ал қалған 3 000-ы 2025 жылдың наурыз айының соңына дейін орнатылады. 

– 2022 жылдың тамыз айынан бастап Алматы қаласында «Бірыңғай бейнемониторинг жүйесі» жобасы іске асырылып келеді. Оның басты міндеті – барлық қалалық бейнебақылау камерасын бір платформада біріктіру және алынған бейнематериалға нақты уақыт режимінде сараптама жасау, - деп хабарлады Алматы қаласы цифрландыру басқармасынан. 

Айта кетейік, бұған дейін Алматыда бірыңғай жүйеге 45 мың камера қосылғанын жазғанбыз. Оның ішінде қалада 9 034 бейнекамерадан тұратын 1 641 «Сергек» кешені жұмыс істеп тұр. 

Сондай-ақ ведомство мәліметіне сәйкес, «Ақылды қала» жобасы аясында кешенді қауіпсіздік жүйесі бүгінгі күні 214 жалпы білім беру мекемелерінде және 193 мектепке дейінгі ұйымдарда орнатылған. Бұл жоба аясында бейнебақылау жүйесі, өрт-күзет дабыл жүйесі, кіруді бақылау және басқару жүйесі, СОС дабыл түймесі, домофон байланысы жүйесі орнатылады. 

– 2024 жылдың соңына дейін денсаулық сақтау мекемелерінде кешенді қауіпсіздік жүйесі жобасын іске асыру жоспарланып отыр, - деп хабарлады цифрландыру басқармасынан.

Еске салайық, 2023 жылы тамыз айында Алматының мектептері кешенді қауіпсіздік жүйесіне қосылатынын жазған едік.