2025 жылы 4 мың шақырым автожол ақылы болады
НҰР-СҰЛТАН. ҚазАқпарат – 2025 жылдың соңына дейін 4 мың шақырым жолға ақылы жүйе енгізіледі. Бұл туралы ҚР Индустрия және инфрақұрылымдық даму министрі Қайырбек Өскенбаев айтты, деп хабарлайды ҚазАқпарат тілшісі.
Оның айтуынша, ақылы төлем жүйесі реконструкцияланған жолдарды нормативтік жағдайда күтіп-ұстау шығындарын толық көлемде өтеуге және республикалық бюджетке жүктемені азайтуға мүмкіндік береді.
«Ақылы жол реконструкциялау немесе жол-жөндеу жұмыстарынан кейін енгізіледі. Бұл жол қауіпсіздігі мен оның қолайлылығын қамтамасыз етеді. Жолдарға жұмсалған шығынды одан әрі өзін-өзі ақтау мақсатында ұзындығы 2500 шақырым екінші санаттағы автожол учаскелерінде қоғамдық пікірді ескере отырып және оларды нормативтік жағдайға келтіргеннен кейін ақылы төлем жүйесін енгізу қарастырылып жатыр», - деді Қайырбек Өскенбаев Үкімет отырысында.
Жалпы «Қуатты өңірлер – ел дамуының драйвері» ұлттық жобасына сәйкес, 2025 жылдың соңына дейін ұзындығы 4 мың шақырым бірінші және екінші санаттағы автожолдар учаскелерінде қосымша ақылы жолдар енгізу көзделген.
Еске сала кетсек, 2021 жылы еліміздегі ақылы жолдардан 8 млрд теңге қаржы түскен. Бұл қаржы сол жолдарды күтіп баптау мен сапасын арттыра түсуге жұмсалады.
