22 наурызда нөсер жаңбыр жауып, жел күшейеді
НҰР-СҰЛТАН. ҚазАқпарат - Синоптиктер 22 наурыз күні Қазақстанда ауа райы қандай болатынын айтты, деп хабарлайды ҚазАқпарат.
«Қазгидромет» РМК мәліметінше, 22 наурызда солтүстік циклон және онымен байланысты атмосфералық фронттардың әсерінен Қазақстанның басым бөлігінде жауын-шашын (көбіне жаңбыр) болады. Еліміздің оңтүстік-шығысы мен шығысындағы таулы аудандарда нөсер жаңбыр жауады.
Тек еліміздің батысы мен оңтүстік-батысында ауа райы жауын-шашынсыз, күн ашық болады. Республиканың кей жерлерінде жел күшейіп, тұман, көктайғақ сақталады. Солтүстікте жаяу бұрқасын соғады.
Ақмола облысының кей жерлерінде тұман, көктайғақ күтіледі, түнде жел 15-20, екпіні 25 м/с, күндіз кей жерелерінде 15-20 м/с күшейеді.
Солтүстік Қазақстан, Павлодар облыстарының кей жерлерінде тұман, көктайғақ күтіледі, басым бөлігінде жел жылдамдығы 15-20, 23-28 м/с жетеді. Солтүстік Қазақстан облысының кей жерлерінде жаяу бұрқасын көтеріледі.
Шығыс Қазақстан облысының кей жерлерінде тұман түсіп, көктайғақ болады. Секундына 15-20, 25 метр жылдамдықпен күшті жел тұрады.
Маңғыстау, Атырау, Батыс Қазақстан, Жамбыл облыстарының кей жерлерінде тұман түседі. Жамбыл облысының кей жерлерінде жел қарқыны 15-20 м/с дейін күшейеді.
Қостанай, Қарағанды облыстарының кей жерлерінде тұман, көктайғақ күтіледі, жел екпіні - 15-20 м/с.
Алматы, Түркістан облыстарында кей жерлерде жел 15-20 м/с күшейеді.
