24 млн теңгесінен айырылды: Ақмола облысында интернет алаяқтыққа қатысты іс тергеліп жатыр
АСТАНА. KAZINFORM — Ақмола облысының кәсіпкері ірі интернет-алаяқтықтың құрбаны болды. Бұл туралы облыстық полиция департаментінің баспасөз қызметі жариялады.
Жәбірленушінің айтуынша, өздерін банк қызметкері ретінде таныстырғандар оны бірден үш банкте бірнеше несие ресімдеуге көндірген. Осыдан кейін ол барлық қаражатты алаяқтар көрсеткен шоттарға аударған.
Алаяқтар онымен телефон арқылы ғана емес, бейне қоңырау арқылы да тұрақты байланыста болған. Сонымен қатар, олар ер адамға күдік туғызбау үшін банк қызметкерлеріне қандай түсініктеме беру керектігін алдын ала нұсқаған. Атап айтқанда, өтініш берушіге құрылыс материалдарын сатып алу үшін үлкен сома қажет екенін хабарлау ұсынылды.
Бірнеше күн бойы жәбірленуші алаяқтардың нұсқауы бойынша әрекет етіп, банктердің филиалдарына, сондай-ақ елорданың сауда үйлеріне барып, сол жерден дропперлердің шоттарына мобильді аударымдар жасаған. Небәрі төрт күн ішінде келтірілген залал 24 миллион теңгеден асты.
Осы факті бойынша сотқа дейінгі тергеу амалдары жүргізіліп жатыр.
— Полицейлер азаматтарды кезекті рет белгісіз тұлғалардың қоңырауларына сенбеуге, олар кім болып көрінсе де, үшінші тұлғалардың нұсқауы бойынша несиелер ресімдеуден және ақшалай қаражатты күмәнді шоттарға аударудан бас тартуға шақырады, — делінген ақпаратта.
Айта кетейік, Қазақстанда 600 адамды алдаған күдіктілер 916 млн теңгені иемденген.
