3-5 қыркүйекте күн суытып, күздің ызғары біліне бастайды
АСТАНА. KAZINFORM — Қазгидромет синоптиктері 3-5 қыркүйек аралығына арналған үш күндік ауа райы болжамын жариялады.
Алдағы үш күнде Қазақстанның басым бөлігінде ауа райының тұрақсыз сипаты сақталады.
Найзағай жарқылдап, жаңбыр жауады.
Республиканың солтүстігінде, шығысында кейбір уақытта қатты жаңбыр жауып, 3 қыркүйек түнде елдің шығысында жауын-шашын (жаңбыр, қар) жауады.
Қазақстанның батысы мен оңтүстігінде Солтүстік-батыс антициклонының әсерінен жауын-шашынсыз ауа райы күтіледі.
Республика бойынша жел күшейеді деп болжанып отыр. Түнгі және таңертеңгі сағаттарда солтүстік және шығыс аймақтарда тұман түсіп, топырақ бетінде 2 градусқа дейінгі үсік болады.
Сондай-ақ күндіз ауа температурасы біртіндеп төмендейді: елдің солтүстік-батысында, солтүстігінде және орталығында +8+15°С дейін, оңтүстігінде +20+28°С дейін төмендейді.
