30 ізгі іс: Алматыда 465 пәтерге қауіпсіздік құрылғылары орнатылды
АСТАНА. KAZINFORM — Төтенше жағдайлар министрлігінің құрылғанына 30 жыл толуына орай, Алматы қаласының ТЖД «30 ізгі іс» атты ауқымды науқан жариялады.
Ведомствоның баспасөз қызметі атап өткендей, оның аясында балалардың терезеден құлауын алдын алу бойынша профилактикалық бағдарлама жүзеге асырылып жатыр.
— Қала әкімдігінің қолдауымен 1425 терезелердің ашылуын шектейтін құрылғылар сатып алынып, олар мұқтаж санаттағы — көпбалалы отбасылар мен әкімшіліктің есебінде тұрған әлеуметтік осал топтар санатына кіретін отбасыларға орнатылмақ. Бүгінгі күнге дейін бұл құрылғылар 465 пәтерге тегін орнатылды, — делінген хабарламада.
Техникалық шаралардан басқа, алдын алу шараларға ерекше назар аударылып келеді:
— тұрғындарға қауіпсіздік шаралары туралы еске салатын апталық SMS-хабарламалар жіберіледі;
— мектептер мен балабақшаларда жазғы демалысқа дейін оқыту сабақтары мен ойындар өткізілді;
— халықпен кездесулер ұйымдастырылып, 7000-нан астам ақпараттық парақша таратылды;
— ТЖД қызметкерлерінен «Жылжымалы қауіпсіздік мектебі» құрылып, түсіндірме сабақтары аясында балалар лагерінде 170-тен астам бала оқытылды.
Қалалық ТЖД мәліметінше, науқанның мақсаты — әрбір баланың өмірі мен денсаулығын сақтау. Аталған жұмыстар жалғасын табады.
Осыдан бұрын Алматыда электровелосипед иелеріне ескерту жасалды.
