32 келі есірткі заттарын сақтаған қостанайлық ұсталды
Полиция қызметкерлерінің жедел іздестіру іс-шаралары нәтижесінде Қостанай қаласындағы гараж кооперативтерінің бірінен күдікті азамат ұсталды.
«Қызметкерлер оның «Лада-Калина» автокөлігінен алты килограмм кептірілген марихуана тапты. Ұсталған азаматтың гаражынан қызметтік-іздестіру итінің көмегімен тінту кезінде марихуана бар тағы екі түйіншек тәркіленді. Гараж кіреберісіндегі тумбадан бір жарым килограмм есірткі, сондай-ақ тақтайшалар астындағы шұңқырдан қапшыққа салынған 25 килограмнан астам марихуана табылды», - делінген полицияның ақпатаратында.
Тәркіленген есірткі затының жалпы салмағы – 32 кг 826 гр, бұл аса ірі салмаққа жатады. Күдіктінің мүлкі тәркіленіп, он жылдан он бес жылға дейінгі мерзімге бас бостандығынан айырылуы мүмкін. Ол оқиға орнында қамауға алынды.