40 мың астаналық үй кезегінде тұр, биыл соның 3 мыңы баспаналы болады
АСТАНА. KAZINFORM - 2024 жылы елордада кезекте тұрғандарға 3,3 мыңнан астам пәтер беріледі.
Осы жылдың 30 наурызындағы жағдай бойынша елордада әлеуметтік тұрғын үй алуға кезекте 40 878 азамат тұр.
Олар мына санаттағы азаматтар:
— Жетім балалар, ата-ана қамқорлығынсыз қалған балалар санаттары бойынша кезекте тұр.
— «Алтын алқа», «Күміс алқа» алқаларымен наградталған немесе бұрын «Батыр ана» атағын алған, сондай-ақ I және II дәрежелі «Ана даңқы» ордендерімен наградталған көпбалалы аналар, көпбалалы отбасылар;
— халықтың әлеуметтік осал топтары;
— мемлекеттік қызметшілер, бюджеттік ұйым қызметкерлері, әскери қызметшілер;
— Қазақстан заңнамасында белгіленген тәртіппен жалғыз тұрғын үйі апатты деп танылған азаматтар.
2024 жылы елорданың тұрғын үй инспекциясы басқармасы 3 382 пәтер беруді жоспарлап отыр.
Бүгінгі таңда аталған пәтерлердің 1 342-сі бөлінді.
Естеріңізге сала кетейік, елордада ескі тұрғын үйлерді жаңарту бағдарламасы аясында апатты үйлерді бұзу және елорда тұрғындарын жаңа тұрғын үйге көшіру қарастырылған.
2024 жылы 60 апатты үйдің тұрғындары 1400 пәтерге көшіріледі, яғни елорданың 4200-ге жуық тұрғыны жаңа тұрғын үймен қамтамасыз етіледі.
