55 жастағы әйел Бурабай тауына шығып, өз бетімен түсе алмай қалған
КӨКШЕТАУ. ҚазАқпарат – 55 жастағы әйел Бурабай курортында тауға шығып, өз бетімен төмен түсе алмай қалған, деп хабарлайды ҚазАқпарат.
«6 қыркүйек күні сағат 15:50 шамасында құтқарушыларға Бурабай курортында таудың басына шыққан әйел төмен түсе алмай тұрғандығы туралы хабар түсті. Шақырту орнына дереу Бурабай және Щучідегі құтқару жасағының 4 құтқарушысы мен 1 арнайы техника жұмылдырылды. Анықталғандай, «Бурабай» шипажайында демалып жатқан 7 адамнан тұратын туристер тобы орман жолы арқылы таудың басына шыққан. Кейін төмен түсерде 1965 жылғы әйел аяғын жарақаттап алған», - деді Ақмола облыстық Төтенше жағдайлар департаментінің баспасөз қызметінен.
Ведомстводан атап өткендей, құтқарушылар әйелді таудың басынан түсіріп, медициналық жедел-жәрдем бригадасына тапсырды.
