7 мамырда елодада кейбір автобус бағдарлары ішінара өзгереді
АСТАНА. ҚазАқпарат - 7 мамыр - Отан қорғаушы күнін мерекелеу кезінде елордада кейбір қоғамдық көліктердің қозғалысы өзгереді. Бұл туралы бүгін баспасөз мәслихатында Астана қаласы Жолаушылар көлігі және автомобиль жолдары басқармасы басшысының орынбасары Әбдіхамит Тамабаев мәлім етті.
Оның сөзіне қарағанда, елордада әсери парадтың өтуіне орай бірқатар көшелерде қозғалыстың шектелуіне байланысты бірқатар қоғамдық көліктердің бағдары ішінара өзгереді.
Атап айтқанда, №3 бағыттағы автобустың қозғалыс кестесі Тәуелсіздік даңғылынан Б. Момышұлы даңғылына дейін шектеліп, одан әрі М. Жұмабаев көшесі арқылы «Сарайшық» тұрғын үй кешеніне дейін жүреді.
Ал № 4 бағыттағы автобустың қозғалысы Б. Момышұлы даңғылынан Тәуелсіздік даңғылына дейін шектеледі.
№14 бағыттағы автобустың қозғалыс сызбасы Қ. Сәтбаев көшесінің бойымен (бұрынғы Л. Мирзоян көшесі) Ақыртас көшесіндегі соңғы аялдамаға дейін өзгереді.
«№ 19, 35, 40 бағыттардағы жолаушылар көлігінің қозғалыс сызбасы Б. Момышұлы даңғылының бойымен М-1 көпіріне дейін өзгеріп, одан әрі бұрынғы сызба бойынша жүреді»,-деді Әбдіхамит Тамабаев.
№ 21 бағыттағы автобустың қозғалысы Сығанақ көшесінің бойымен Орынбор көшесіне дейін шектеледі (көлік жолайырығы). № 32, 46 бағыттардағы автобустардың қозғалыс сызбасы Айнакөл көшесінің бойымен М. Жұмабаев көшесіне дейін өзгертіледі, Б.Момышұлы даңғылы М-1 көпіріне дейін, одан әрі бұрынғы қозғалыс сызбасы бойынша жүреді.
Естеріңізге сала кетейік, қазіргі уақытта Тәуелсіздік даңғылының бойында А. Байтұрсынов көшесінен Ж. Нәжімеденов көшесіне дейін көлік қозғалысы тоқтатылады. 7 мамыр күні сағат таңғы 6.00-дан 14.00-ге дейін Тәуелсіздік даңғылының бойында Б. Момышұлы даңғылынан Ш. Қалдаяқов көшесіне дейін, Ш. Қалдаяқов көшесі М-3 жолайырығынан Обаған көшесіне дейін, Р. Қошқарбаев көшесі Б. Момышұлы даңғылынан Сарыкөл көшесіне дейін, Айнакөл көшесі Сарыкөл көшесінен Ж. Нәжімеденов көшесіне дейін жолдар жабылады.
