81 жастағы қария газға уланып қалды - Атырау
АТЫРАУ. ҚазАқпарат – Атырау облысында 81 жастағы қария газға уланып, ауруханаға түсті, деп хабарлайды ҚазАқпарат.
Облыстық төтенше жағдайлар департаментінің баспасөз қызметінен мәлім еткендей, 23 қаңтарда Жылыой ауданында жеке иеліктегі үйдің жылыту пешінен ақау шыққан.
Бұл туралы сағат 18:12-де хабар түскен.
«Жылыой ауданының орталығы – Құлсары қаласындағы Нұрманов көшесінде орналасқан жеке үйде 1941 жылғы қария улы газға уланып қалды. Соның салдарынан 81 жастағы қария аудандық орталық ауруханаға түсті. Дәрігерлер оған орташа ауырлықтағы улану диагнозын қойды», -деп хабарлады департаменттің баспасөз қызметі.
Оқиға орнында департаменттің Жылыой аудандық бөлімінен 1 қызметкер, «Жылыойгаз» ЖШС-нен 2 қызметкер мен 1 техника жұмылдырылды.
Еске сала кетелік, бұдан бұрын Атырауда 9 жасар бала жоғалып кетіп, кейіннен оның денесі судан табылғанын жазған едік.
