85 жастағы маңғыстаулық шебер ұлттық құндылықты насихаттап жүр
АҚТАУ.ҚазАқпарат - 85 жастағы Маңғыстау ауданының тұрғыны, шебер ұлттық құндылықты ұлықтап жүр, деп хабарлайды ҚазАқпарат тілшісі.
Қолөнерші Шархат Төлемісова киіз үйді көздің қарашығындай сақтап, қастерлеп келеді. Маңызды мерекелер мен той-думандарда көз тартар қазақтың қасиетті киіз үйін тігіп, болашақ ұрпаққа насихаттаудан жалыққан емес.
Шархат Төлемісқызы - он баланы өмірге әкелген алтын құрсақты ана. Ұлттық қолөнерді дамыту, оны келешек ұрпаққа табыстау - басты парызым деп біледі. Осынша жасқа келсе де киім тоқу, жүн сабау, ұршық иіру, бұйымды ою-өрнекпен безендіру ол кісінің сүйікті ісі.
«Елдің түкпір-түкіпірінен келген танымал тұлғалар менің өз қолымнан әсемдеп жасаған, қазақи қалпын сақтаған киіз үйіме талай тамсанған», - дейді шебер.
Киіз үйін жыл сайын жаңартып тігіп, жабдықтап отырады. Ісмер жанның әртүрлі тәсілмен жасаған бұйымдары ерекше.
