Ә.Исекешев: Жыл басынан 500-ден астам инвесторға «бір терезе» ұстанымы арқылы қызмет көрсетілді
АСТАНА. ҚазАқпарат - Жыл басынан 500-ден астам инвесторға «бір терезе» ұстанымы арқылы қызмет көрсетілді. Бұл туралы бүгін Астана экономикалық форумы аясындағы Инвестициялық саммитте ҚР Инвестициялар және даму министрі Әсет Исекешев мәлім етті.
«Жыл басынан бастап «бір терезе» ұстанымы бойынша 500-ден астам инвесторға қызмет көрсетілді. Жаңа әдістің таяу болашақта өз нәтижесін көрсететіндігін және біздің осы жерде, Қазақстанда инвестициялық серпілісті көретіндігімізге сенімдімін», - деді министр.
Оның атап өтуінше, Шетелдік инвесторлар кеңесіне Президенттің өзі төрағалық етеді. Мұнан бөлек, Премьер-Министр жанынан Инвестициялық ахуалды жақсарту кеңесі құрылған.
«Мен инвестициялық омбудсменмін. Бұл сұхбат алаңы Қазақстандағы инвестициялық қызмет барысында туындайтын проблемалық мәселелерді жедел шешуге бағытталған», - деді Ә.Исекешев.
