А.Мұсақожаева Австралияда өнер көрсеткісі келеді

АСТАНА. ҚазАқпарат - Қазақ Өнер университеті келер жылы Азия мен Латын Америкасында өнер көрсетуді жоспарлауда. Бұл туралы бүгін ҚР Президенті жанындағы Орталық коммуникациялар қызметіндегі брифингте аталған өнер ордасының ректоры Айман Мұсақожаева айтты.

«Біз ең алдымен Қазақстан бойынша концерттер жоспарлаймыз әрі біздің тыңдармандарымызға арнап концерттік бағдарлама әзірлейміз. Қазіргі уақытта біздің балаларымыз, Еуразиялық симфониялық оркестр Испанияға аттанып кетті. Олар оқу-өндірістік тәжірибе аясында 10 концерт беретін болады. Оркестр Барселонадан бастап Испанияның барлық өңірлерін аралап, өнер көрсетеді», - деді ол.

Сонымен қатар А.Мұсақожаева білім ордасының келесі жылы да гострольдік сапар жоспарлап отырғанын, оған Үкімет тарапынан арнайы қаржы да қарастырылғанын атап өтті.

«Біз мұндай концерттерді жыл сайын айқындап отырамыз. Мәселен, осы жылы біз Лондонда, Парижде, Оңтүстік Корея мен Испанияда өнер көрсетсек, келесі жылы Азия мен Латын Америкасы өңірлерін толық қамтығымыз келеді. Біздер осы бағытта жұмыстар жүргізудеміз», - деген атақты скрипкашы әлі күнге табаны тимеген Австралия жерінде өнер көрсеткісі келетіндігін жасырмады.