А/Н1N1 тұмауымен ауырған алматылықтың жағдайы қанағаттанарлық
АЛМАТЫ. Тамыздың 6-сы. ҚазАқпарат /Айгүл Тұрысбекова/ - Алматыда А/Н1N1 тұмауының үшінші оқиғасы тіркелді. Вирусты АҚШ-тан қызмет іссапарынан оралған қазақстандық әскери қызметкер жұқтырып алған.
Мемлекеттік санитарлық-эпидемиологиялық қадағалау комитетінің Алматы облысы бойынша департаменті директорының орынбасары Айзат Молдағасымованың айтуынша, қазақстандық азамат АҚШ-тан тамыздың 3-інде Алматы әуежайына ұшып келген. Сол рейстің барлық жолаушылары сияқты ол да тепловизордан өткен. Бірақ аурудың ешқандай белгісі тіркелмеген. Тамыздың 4-і күні өзін жайсыз сезінген ол, әскери госпитальге түскен. Науқастың жағдайы орташа ауыр деп бағаланған. Тамыздың 5-і күні республикалық СЭС референс-зертханасында А/H1N1 тұмау вирусының штаммы оң нәтиже берді.
«Жүргізілген ем-домнан кейін қазір науқастың жағдайы қанағаттанарлық. Онымен қарым-қатынаста болған бес адам анықталып, бақылауға алынды. Олардың жағдайлары ешқандай алаңдаушылық туғызып отырған жоқ», - деп атап көрсетті Ә.Молдағасымова.
