А.Рахметулин: Сот төрелігі институты магистранттарына судьялыққа біліктілік емтиханын тапсыруда міндетті психологиялық тестілеу енгізу қажет
АСТАНА. ҚазАқпарат - Сот төрелігі институты магистранттарына судьялыққа біліктілік емтиханын тапсыруда міндетті психологиялық тестілеу енгізу қажет. Бұл туралы бүгін ҚР Президенті жанындағы ОКҚ-де өткен брифингте ҚР Жоғарғы Соты Қылмыстық істер жөніндегі қадағалаушы сот алқасының төрағасы Абай Рахметулин мәлім етті.
А.Рахметулин өз сөзінде мамандандырылған магистратураны бітірген судьялыққа кандидаттарға қойылатын біліктілік талаптарын күшейту мәселесіне тоқталды.
«21-22 жас бұл жоғары заңгерлік білім алу кезеңі. 25-27 жас Сот төрелігі институтына магистратурада білім алу үшін түсетін уақыт. 28-29 жаста бір жылдан үш жылға дейінгі сынақ мерзімімен сот лауазымына тағайындалу үшін байқауға қатысуы қажет», деді Сот алқасының төрағасы.
Оның сөзіне қарағанда, одан кейін 30-32 жаста Президенттің судья лауазымына тағайындау туралы Жарлығы шығуы керек.
«Мамандандырылған магистратурада судья лауазымына біліктілік емтиханын тапсыру барысында міндетті психологиялық тестілеу енгізу қажет», - деді ол.
