Абай облысында 18 адам қар құрсауынан құтқарылды
СЕМЕЙ. KAZINFORM – Абай облысында қар құрсауында қалған 18 адам құтқарылды.
Түнгі уақытта Көкпекті ауданында, Көкпекті ауылынан 30 шақырым жерде жабық автожол учаскесінде 6 жүк және 2 жеңіл автокөлік қарға батып, қозғалысын жалғастыра алмай қалған.
Облыстық төтенше жағдайлар департаментінің күштерімен барлығы 18 адам құтқарылып, Көкпекті ауылына жеткізілді. Құтқарылған азаматтарға медициналық көмек қажет болмаған.
- Анықталғандай, жүргізушілер жол қозғалысына шектеу енгізілгенге дейін аталған жол учаскесіне шығып кеткен, - делінген ақпаратта.
Төтенше жағдайлар министрлігі азаматтарға сапарға шығар алдында автожолдардың жай-күйі туралы ақпаратты нақтылап, жауапты қызметтердің ұсынымдарын қатаң сақтауды ескертеді.
Айта кетейік, Жетісу облысында құтқарушылар қар құрсауында қалған 17 адамды эвакуациялады.
