Абай облысында балабақша қызметкерлерінің дербес деректері тарап кеткен
АСТАНА. KAZINFORM — Курчатов қаласының прокуратурасы мемлекеттік сатып алу саласына жүргізілген талдау барысында қаладағы балабақшалардың бірінің 75 қызметкерінің дербес деректерінің таралуына байланысты заңнама бұзушылықтарын анықтады. Бұл туралы өңірлік прокуратура мәлім етті.
— Білім беру мекемесі қызметкерлерді мерзімдік медициналық тексеруден өткізу бойынша конкурс жариялау кезінде ашық қолжетімділікке қызметкерлердің толық сауалнамалық деректерін, ЖСН-ін және өзге де құпия ақпаратты қамтитын тізімді орналастырған, — делінген хабарламада.
Қолжетімділігі шектеулі ақпаратқа қолжеткізе алатын тұлғалар оның құпиялылығын қамтамасыз етуге міндетті және дербес деректерді субъектінің келісімінсіз немесе заңды негіздерсіз таратуға құқылы емес.
Мекеме басшылығы тарапынанаталған талаптардың сақталмауы дербес ақпараттың құқыққа қайшы мақсаттарда пайдаланылу қаупін туындатқан. Прокуратура қабылдаған шаралар нәтижесінде көрсетілген бұзушылықтар жойылып, кінәлі лауазымды тұлға ҚР ӘҚБтК 79-бабы 2-бөлігі (Қазақстан Республикасының дербес деректер және оларды қорғау туралы заңнамасын бұзу) бойынша 432 500 теңге мөлшерінде айыппұл салумен әкімшілік жауаптылыққа тартылды.
Абай облысының прокуратурасы азаматтардың құқықтары мен заңды мүдделерін қорғау бойынша жұмысты жалғастыра береді.
Айта кетейік, бұған дейін Павлодарда 2 мыңнан астам білім беру қызметкерінің деректері тарап кеткен еді.
