Абай облысында дропперлікке қатысты 40 қылмыстық іс тіркеліп, 9 адам сотталды
АСТАНА. KAZINFORM – Абай облысында жыл басынан бері дропперлікке қатысты 40 қылмыстық іс тіркеліп, 9 адам сотталған. Полиция азаматтарға оңай табыс табу туралы ұсыныстардың артында қылмыстық схема жасырынуы мүмкін екенін ескертті, деп хабарлады Polisia.kz.
Құқық қорғау органдарының мәліметінше, алаяқтар азаматтарға банк карталарын пайдалануға беруді немесе өз шоттарына түскен ақшаны басқа шоттарға аударуды ұсынып, сол үшін сыйақы уәде етеді.
Осылайша қаскүнемдер қылмыстық жолмен алынған қаражатты аударуға және қолма-қол ақшаға айналдыруға көмектесетін адамдарды өз әрекеттеріне тартады. Мұндай адамдар дропперлер деп аталады.
Полиция күмәнді қаржылық операцияларға қатысу қылмыстық жауапкершілікке әкелуі мүмкін екенін ескертеді.
Абай облысында 2026 жылдың басынан бері дропперлікке байланысты 40 қылмыстық іс тіркелген. Осы істер бойынша 9 адам сотталған.
Құқық қорғау органдары азаматтарды қосымша табыс табу туралы күмәнді ұсыныстарға сақтықпен қарауға шақырады.
– Полиция ескертеді: банк карталарыңызды, жеке деректеріңіз бен SMS-кодтарды бөгде адамдарға бермеңіз. Бейтаныс адамдардың ақшасын сыйақы үшін аударуға келіспеңіз. Егер банк шотыңыздың заңсыз операцияларға пайдаланылып жатқанын байқасаңыз немесе оған қолжетімділікті басқа адамға беріп қойған болсаңыз, дереу банкке, «102» нөмірі арқылы полицияға мәлімдеңіз, – делінген хабарламада.
Мамандар банк картасын немесе мобильді банкингке қолжетімділікті басқа адамға беру қаржылық алаяқтық схемасына қатысу қаупін арттыратынын ескертеді.
Сондықтан өз шотына бейтаныс адамдардан ақша қабылдап, оны сыйақы үшін басқа шоттарға аударуға келіспеу қажет.
Егер азамат банк шотының заңсыз операцияларға пайдаланылып жатқанын байқаса, дереу банкке хабарласып, полицияға жүгінуі тиіс.
Айта кетейік, бұған дейін Қазақстанда дропперлік үшін қылмыстық жауапкершілік енгізілгені хабарланған болатын. 2025 жылғы 16 қыркүйектен бастап Қылмыстық кодекстің 232-1-бабы күшіне енді. Заң бойынша мұндай әрекеттер үшін айыппұлдан бастап, мүлкін тәркілей отырып, 7 жылға дейін бас бостандығынан айыру жазасы қарастырылған.
