Абай облысында төрт шетел азаматы Қазақстан азаматтығын алды
АСТАНА. KAZINFORM — Абай облысында төрт шетел азаматы Қазақстан Республикасы Президентінің 2026 жылғы 8 маусымдағы № 1308 Жарлығына сәйкес Қазақстан Республикасының азаматтығына қабылданды.
Азаматтық рәсімін ресімдеу жұмыстарын сүйемелдеуде Абай облысы Полиция департаменті Көші-қон қызметі басқармасының қызметкерлері маңызды рөл атқарды. Көші-қон қызметінің мамандары заң талаптарына сәйкес құқықтық сүйемелдеу жұмыстарын жүргізіп, өтініш берушілерге кеңес беріп, барлық қажетті рәсімдердің ұйымдастырылуын қамтамасыз етті.
Жаңа азаматтар бұған дейін басқа мемлекеттердің азаматтары болғанымен, ұзақ жылдар бойы Қазақстанда тұрақты тұрып келген. Олардың кейбірі елімізде бес жылдан астам уақыт өмір сүрсе, енді біреулері жиырма жылдан астам уақыттан бері тұрып келеді. Осы уақыт ішінде олар қазақстандық қоғамның ажырамас бөлігіне айналып, отбасын құрып, еңбек етіп, өңірдің қоғамдық өміріне белсенді түрде қатысып келеді.
— Қазақстан біз үшін туған үйімізге айналды. Мұнда біздің отбасыларымыз тұрады, балаларымыз өсіп келеді, болашағымызды осы жерде құрып жатырмыз. Азаматтық алу — өміріміздің жаңа парағын ашатын маңызды әрі толғандырарлық оқиға, — деп бөлісті Қазақстан Республикасының жаңа азаматтары.
Көші-қон қызметі қызметкерлерінің айтуынша, азаматтық мәселелері бойынша жұмыс — азаматтар мен ел аумағында тұрақты тұратын адамдардың конституциялық құқықтарының жүзеге асырылуын қамтамасыз етуге бағытталған қызметтің маңызды бағыттарының бірі.
Бұдан бұрын соңғы 8 жылда Қазақстан азаматтығынан шығуға өтініш бергендер саны 40 есеге жуық азайғанын жаздық.
