Абай облысындағы өрт: Қамысты шарпыған жалынмен күрес жалғасуда
СЕМЕЙ. ҚазАқпарат – Абай облысы Көкпекті ауданында қамысты шарпыған жалынмен күрес жалғасуда, деп хабарлайды ҚазАқпарат тілшісі.
Абай облысы әкімдігінің мәліметіне сүйенсек, қазіргі уақытта Көкпекті ауданындағы өртті өшіруге 20 адам мен 3 техника жұмылдырылған. Ертіс өзенінің жағалауындағы Кеңқолтық учаскесінде қамыс өртеніп жатыр.
«Өрт жайлы ақпарат жедел штабқа кеше сағат 19:32-де түсті. Оқиға орнына жергілікті атқарушы органдар мен Көкпекті аудандық ТЖБ қызметкерлері шұғыл жетті. Өрт ошағына ең жақын елді мекен 60 шақырымдай жерде орналасқан. Ауылға және шаруа қожалықтарына қауіп төніп тұрған жоқ. Тілсіз жаумен күрес жалғасуда. Өрттің жалпы ауданы шамамен 200 гектарды құрайды», - делінген ақпаратта.
Еске салсақ, осыған дейін Абай облысында кешеден бері дала өртінің беті қайтпай жатқаны хабарланған.
