Абай облысының құрылуы тұрғындардың әл-ауқатын арттыруға ықпал етеді - Президент
Мемлекет басшысы Абай облысының жұртшылығымен кездесу барысында халықтың қалауымен осы аймақта жеке облыс құру туралы шешім қабылдағанын еске алды, деп хабарлайды ҚазАқпарат.
«Мен биыл халықтың қалауын ескере отырып, осы аймақта жеке облыс құру туралы шешім қабылдадым.
Аталған қадам өңірдің әлеуметтік-экономикалық мәселелерін жедел шешіп, тұрғындардың әл-ауқатын арттыруға ықпал етеді. Инвестицияның келуіне, өнеркәсіп пен жұмыс орындарының ашылуына, шағын және орта бизнестің дамуына жағдай жасайды. Аймақты республикалық бюджеттен тікелей қаржыландыру жүйесі жүзеге асады», - деді Президент Қасым-Жомарт Тоқаев.
Оның пайымынша, бұл шешім – шын мәнінде, тарихи әділдіктің салтанат құруы.
«Біз жаңадан құрылған облысты ұлттың ұлы тұлғасына деген ерекше құрмет белгісі ретінде Абай деп атадық», - деді содан соң Мемлекет басшысы.
Фото: yvision.kz
