Әбілхан Аманқұл арландықтардың жеңісін еселей түсті

АСТАНА. ҚазАқпарат - Щучье қаласында өтіп жатқан  Бүкіләлемдік бокс сериясының (WSB) 8-маусымы аясында Әбілхан Аманқұл ресейлік Расул Алиевтен басым түсті, деп хабарлайды ҚазАқпарат.

75 келіге дейінгі салмақта 2017 жылғы WSB чемпионы Әбілхан Аманқұл ресейлік танымал боксшы Расул Алиевпен жұдырықтасты. Кездесудің 5 раунды да тартысты болды. Нәтижесінде Әбілхан ресейлікті 3-0 есебімен жеңді.

Енді 49 келіге дейінгі салмақта Қазақстанның 4 дүркін чемпионы, Азия чемпионы, 2015 және 2017 жылдардағы WSB чемпионы Теміртас Жүсіпов Ресейдің Алыс Шығыс Федералды округі чемпионатының екі дүркін жеңімпазы Борис Сидоровпен кездеседі.

Бұған дейін 60 келіге дейінгі салмақ санатында шаршы алаңға шыққан Қазақстанның 3 дүркін чемпионы, Азия ойындарының чемпионы, 2017 жылғы жетінші маусымның WSB чемпионы Ілияс Сүлейменов Ресейдің екі дүркін чемпионы Василий Веткиннен басым түсті. 

Одан кейін 64 келіге дейін салмақта шаршы алаңға көтерілген 2017 жылғы WSB чемпионы Ділмұрат Мәжитовте ресейлік Константин Богомазовтың жолын кесті. 

Ал ауыр салмақта бірқатар халықаралық турнирдің жеңімпазы Нұрбол Алтаев Ресейдің Орталық Федералды округі чемпионатының жеңімпазы Ровшан Ягубзадеден 2-1 есебімен басым түсті. 

Естеріңізге сала кетсек, «Astana Arlans» боксшылары 2018 жылдың бірінші шайқасын Қарағанды қаласында 10 ақпан күні «Indian Tigers» командасына қарсы өткізген болатын. Нәтижесінде арландықтар 4:1 есебімен жеңіске жеткен еді.