Адам папиллома вирусына қарсы екпе алу не үшін маңызды — маман кеңесі

АСТАНА. KAZINFORM — Онкологиялық ғылыми институттың деректері бойынша жыл сайын 2 мың әйел жатыр мойны қоздырғышы дертіне шалдығады, ал 600-дей әйел осы сырқаттан көз жұмады.

Осы орайда аталған вирусқа қарсы вакцинаның маңыздылығы туралы Денсаулық сақтау министрлігі жанындағы Ұлттық қоғамдық денсаулық сақтау орталығы басқарма төрағасының орынбасары Манар Смағұл айтып берді.

— Екпені ерте жаста алса, оның тиімділігі жоғары, себебі аталған вирус түрі Орталық және Оңтүстік Азия аумағында кең таралған. Жалпы өткен ғасырдың 60-жылдары неміс ғалымы жатыр мойны обырының негізгі қоздырғышы вирусына зерттеу жүргізді. 2007-2008 жылдары дамыған мемлекеттер бұл вирусқа қарсы вакцина егуді күнтізбеге енгізді. Осы орайда 2030 жылға дейін 15 жастағы жеткіншек қыздардың 90%-ына вакцина егу керек, — деді Манар Смағұл адам папиллома вирусына қарсы вакцинацияға арналған іс-шара барысында.

Маманның айтуынша, бүгінде елімізде жатыр мойны обырымен сырқаттанушылық көрсеткіші жоғары. 

— Әйелдер арасында бірінші орында омырау қатерлі ісігі (сүт безі) тұрса, екінші орында осы жатыр мойны қоздырғышы, яғни адам папиллома вирусы тұр. Онкологиялық ғылыми институттың деректері бойынша жыл сайын 2 мың әйел жатыр мойны қоздырғышы дертімен ауырады, яғни күніне 5-6 әйелден бұл қатерлі ісік анықталады, ал 600-дей әйел осы сырқаттан көз жұмады. Біздің мақсат — жылына 100 адамға шаққанда, 4 қана факті тіркеу, ол үшін вакцинамен қамтуды жоғары деңгейде қамту қажет, — дейді ол.

Сондай-ақ ұлттық қоғамдық денсаулық сақтау орталығының өкілі вакцинаның оң әсері бірден емес, 10 жылдан кейін байқалатынын айтып отыр. 

Айта кетейік, бүгін елордада Ұлттық қоғамдық денсаулық сақтау орталығының ұйытқы болуымен адам папиллома вирусына (АПВ) қарсы екпе егу шарасы аясында конференция өтіп жатыр. Аталған шараға сала мамандары қатысты. 

Бұған дейін Қазақстанда ер балаларға да адам папиллома вирусына қарсы вакцина егу жоспарда барын хабарлаған болатынбыз. 

Еске сала кетейік, былтыр қыркүйекте елімізде жатыр мойны обырының негізгі қоздырғышы — адам папиллома вирусына (АПВ) қарсы қыздарды жалпы вакциналау басталды. Осы орайда Kazinform агенттігінің тілшісі Қазақстанда аталған инфекцияның таралу статистикасы қандай, бұл вирус не үшін қауіпті және неге екпе алу қажет екеніне шолу жасаған еді.

Өткен жылы Үкімет адам папилломасы вирусына қарсы вакцина сатып алуға 9,7 млрд теңгеден астам қаржы бөлді. 

Сондай-ақ елімізде адам папиллома вирусына қарсы вакцинаның денсаулыққа әсері зерттеліп жатқаны айтылды. 

Одан бөлек, әлеуметтік желілерде және мессенджерлерде адам папилломасы вирусы (АПВ) вакцинациясы бедеулікке әкелетіні туралы жалған ақпарат тарады.