Адвокатқа кімдер тегін жүгіне алады
АЛМАТЫ. ҚазАқпарат - Алматының адвокаттары 2022 жылы 10 мыңнан астам азаматқа тегін заң көмегін көрсетті. Бұл туралы Өңірлік коммуникациялар қызметінің брифингі барысында қалалық әділет департаментінің өкілдері айтты, деп хабарлайды ҚазАқпарат тілшісі.
Алматы қаласы Әділет департаментінің зияткерлік меншік құқықтары бөлімінің басшысы Еркебұлан Жетпісбаевтың сөзінше, азаматтарға құқықтық түсіндіру жұмыстары мен құқықтық көмек пен кеңес беру ведомствоның маңызды бағыттарының бірі. Алимент өндіріп алу, зейнетақы мен жәрдемақылар тағайындау, ақтау, босқын немесе қандас мәртебесін алу мәселелері бойынша жеке тұлғалардың, ата-анасының қамқорлығынсыз қалған кәмелетке толмағандардың; мәртебесіне немесе жағдайына байланысты құқықтары мен заңды мүдделерін қамтамасыз ету және қорғау мәселелері бойынша сексуалдық зорлық-зомбылық, адам саудасы, терроризм актісі құрбандарының не азаптауларға ұшыраған құрбандардың өтеусіз негізде адвокат көмегін алуға құқығы бар.
«Мысалы, жыл басынан адвокаттар мемлекет кепілдік берген 10 509 азаматқа 129 913 750 теңге сомасында заң көмегін тегін көрсетті. Құқық мәдениеті» және «Рухани жаңғыру» арнайы жобалары аясында Әділет департаменті аудандық халыққа қызмет көрсету орталықтарында, әлеуметтік үйлерде, Алматы аудан әкімдіктерімен бірлесіп 800 мыңнан астам азаматты қамти отырып, 322 іс - шара өткізді», - деді спикер.
Оның айтуынша, іс-шаралар аясында департамент мамандары, адвокаттар «мүлік иелерінің бірлестігін» тіркеу, атқарушылық жазба, мұраны ресімдеу, апостиль қою, зияткерлік меншік объектілерін тіркеу және авторлық құқық пен тауар белгісін қорғау, шоттарға тыйым салу және атқарушылық іс жүргізу мәселелері бойынша кеңес береді. Аталған департаментің баспасөз хатшысы Алмас Бекботаев барлық шараға заң қоғамдастығының (адвокаттар, нотариустар, жеке сот орындаушылары және заң консультанттары), жеке сот орындаушыларының өңірлік палатасының, көші-қон полициясының өкілдері және Алматы қаласы мәслихатының депутаттары қатысатынын айтты.
«Құқық түсіндіру жұмыстары жоғары оқу орындары жанындағы заң клиникаларымен бірлесіп жүргізіледі, студенттер үшін Қазақстан Республикасы заңнамасының нормаларын түсіндіру бойынша семинарлар өткізіледі, сондай-ақ студенттер алған білімдерін практикада қолдану үшін «Әділет кеңес береді» акциясы шеңберінде азаматтармен кездесуге шақырылады», - деп атап өтті ол.
Оның сөзінше, қазіргі уақытта, әділет департаменті көші-қон полициясымен және заң қоғамдастығымен бірлесе отырып Алматы қаласының аудандық ХҚКО-да тұрғын үйді жалға беру нарығындағы алыпсатарлық дүрбелеңге байланысты құқықтық түсіндіру жұмыстарын жүргізуде.
Фото: kiwilaws.com
