АЭС құрылысына қажет мамандар енді «Болашақ» арқылы даярланады
АСТАНА. KAZINFORM - 22 мамырда ҚР Атом энергиясы жөніндегі агенттігі «Қазақстандық атом электр станциялары» ЖШС-мен және «Халықаралық бағдарламалар орталығы» АҚ-мен бірлесіп, атом саласының мамандары үшін «Болашақ» халықаралық стипендиясының жаңа мүмкіндіктеріне арналған кездесу өткізді.
ҚР Атом энергиясы жөніндегі агенттіктің баспасөз қызметінің хабарлауынша, бағдарламаның жаңартылған қағидалары шеңберінде алғаш рет атом саласының қызметкерлері үшін жеке санат енгізілді. Бұл жаңашылдық атом саласындағы стратегиялық жобаларды іске асыру, оның ішінде атом инфрақұрылымын дамыту және Қазақстанда АЭС салу үшін инженерлік, ғылыми және техникалық кадрларды даярлауға бағытталған.
Кездесуге сондай-ақ ҚР Ұлттық ядролық орталығының, Ядролық физика институтының, Қазатомөнеркәсіп ҰАК-ның өкілдері қатысты.
Халықаралық бағдарламалар орталығының өкілдері қатысушыларға конкурстық іріктеу тәртібін, кандидаттарға қойылатын талаптарды, «Болашақ» және «Ғылыми тағылымдамалар» бағдарламасына қатысу шарттарын, сондай-ақ қажетті құжаттар тізбесі мен стипендия тағайындау кезеңдерін түсіндірді.
Шетелдік жоғары оқу орындарын таңдау, тілдік дайындық және стипендиаттардың оқуды аяқтағаннан кейінгі одан әрі кәсіби қызметі мәселелеріне жеке назар аударылды.
-Атом саласы үшін «Болашақ» мамандандырылған санатын құру ядролық энергетика саласында кадрларға сұраныстың артуы жағдайында қажет болатын жоғары білікті мамандарды даярлауды күшейтуге мүмкіндік береді,-делінген хабарламада.
Осыған дейін Қазақстан атом энергетикасын дамыту үшін қандай технология қолданатыны туралы жаздық.
