АЭС-тен шыққан отын қалдығын қайтадан қолдануға болады – Саябек Сахиев

АСТАНА. KAZINFORM – АЭС-тен шыққан отын қалдығын қайтадан кәдеге жаратуға болады. Бұл туралы Ядролық физика институтының директоры Саябек Сахиев айтты.

«Атом электр стансасы дегенде жұрттың қорқатыны – қалдықтар. Шындығына келгенде, Жылу электр орталығының АЭС-тен айырмашылығы одан шыққан күлді қайтадан қолдануға болмайды. Ал АЭС қалдықтарын болашақта жаңа АЭС түрлеріне қолдануға болады. Яғни, ол дайын тұрған отын саналады. Міне, осы технологиялар қазір әлемде дамып келеді», - деді ол Үкімет отырысынан кейінгі брифингте.

Оның атап өтуінше, Қазақстан АЭС-тен шыққан отын қалдығын сақтау технологиясын меңгерген.

«Қалдықты болашақта жаңа АЭС-те отын ретінде пайдалануға болады. Мәселен, Франция пайдаланылған отынды қайтадан кәдеге жаратып отыр. Біздің ғалымдар да 2-3 жыл болды, осы технологияны зерттеуге кірісіп кетті. Меніңше, таяу 2-3 жылда өз зерттеулерімізді қосып, мүмкін АЭС салынбай тұрып-ақ отын қалдықтарын қайта өңдеу технологиясын шығаруымыз мүмкін», - деді Саябек Сахиев.

Бұған дейін атом электр стансасы салынған жағдайда Қазақстан отандық кадрларды дайындап үлгеретіндігін жазған едік.