Африка ұлттар кубогы: Мохамед Салах Египет құрамасын жеңілістен құтқарды

Футболдан Африка ұлттар кубогының екінші ойын күні аяқталды, деп хабарлайды Kazinform. 

А тобында сынға түсіп жатқан Нигерия құрамасы алғашқы турда Экваториалды Гвинеямен ұпай бөлісті. Есеп 1:1.

Ойын барысында нигериялық футболшылар тізгінді өз қолында ұстады. Соған қарамастан Экваториалды Гвинея ойыншысы Ибан 36-минутта есеп ашып кетті. Оған нигериялық Виктор Осимхен 38-минутта бір голмен жауап қайырды.

Айта кетсек, аталған топта 13 қаңтарда Кот-д’Ивуар құрамасы Гвинея-Бисау 2:0 есебімен жеңген.

Бұл топта екінші турда 18 қаңтарда Кот-д’Ивуар мен Нигерия, Экваториалды Гвинея мен Гвинея-Бисау ойнайды.

Ал В тобында Мохамед Салах секілді әлем футболының жұлдызы ойнайтын Египет құрамасы Мозамбикпен жасыл алаңға шықты.

Кездесуде египеттік Мұстафа Мохамед небәрі 2-минутта есеп ашты. Одан олар өз қақпасына екі гол жіберіп алды. Бұл голдарды мозамбиктік Вити 55, Клесио Бук 58-минутта өздерінің еншісіне жазды.

Мохамед Салах 95-минутта пенальтиді мүлт жібермей, өз құрамасын жеңілістен құтқарды.

Осылайша кездесуде құрамалар 2:2 есебіне қанағат білдірді.

Сондай-ақ бүгін аталған топта Гана мен Кабо-Верде кездеседі.

Енді египеттік футболшылар 19 қаңтарда Ганамен кездессе, Мозамбик 19 қаңтарда Кабо-Верде құрамасымен жасыл алаңға шығады.

Ойындар 13 қаңтар мен 11 ақпан аралығында Кот-д’Ивуардың Абиджан, Корото, Сан-Педро, Буаке, Ямусукро секілді 5 қаласында орналасқан 6 стадионда өтеді.