Ағымдағы аптаның соңы елордада жауын-шашынсыз өтеді
АСТАНА. 15 тамыз. ҚазАқпарат - Астанада жұмыс аптасының басында ауа райы бұлыңғыр болса, аптаның ортасы жауын-шашынсыз болады.
Бұл туралы astana.kz сайтына «Қазгидромет» РМК хабарлады.
Синоптиктердің болжамынша, жұмыс аптасының екінші жартысында көшпелі бұлт шығады, демалыс күндері жаңбыр жаумайды.
«Бейсенбі күні Астана жауын-шашынсыз болады. Солтүстіктен 5-10 м/с жылдамдықпен жел соғады. Ауа температурасы түнде +8+10°C, күндіз +22+24°C деңгейінде қалыптаспақ», - делінген «Қазгидромет» мәліметінде.
Жұма күні елордада көшпелі бұлт шығады, жаңбыр жаумайды, түнде тұман болады. Солтүстік-шығыстан 5-10 м/с жылдамдықпен жел соғады. Түнде ауа температурасы +10+12°C, күндіз +23+25°C-ге дейін жетеді. Сенбі күні де көшпелі бұлт қозғалып, жауын-шашын болмайды. Солтүстік-шығыстан 9-14 м/с жылдамдықпен жел соғады. Түнде ауа температурасы +10+12°C, күндіз +23+25°C жылы болады.
