Ағзалардың трансплантациясы қажет пациенттер енді шетелдік клиникаларға жіберілмейді
АСТАНА. ҚазАқпарат - Қазіргі уақытта Қазақстан Республикасы ағзалардың трансплантациясын қажет ететін ҚР азаматтарын шетелдік клиникаларға жібермейді, себебі Қазақстанда жүректі ауыстырып салуды қажет етілетін балаларды қоспағанда ағзаларды трансплантациялау түрлерінің барлық спектрі жүргізіледі.
Бұл туралы Facebook-тегі «Помощник Минздрава» парақшасында жазылды, деп хабарлайды ҚазАқпарат.
«Қазақстанның тәуелсіздік алған жылдары ішінде отандық трансплантацияның айтарлықтай дамығаны байқалады. Қазіргі уақытта Қазақстанның трансплантация орталықтары донорлық ағзаларды ауыстырып салуды табысты жүргізуде, бұл отандық мамандардың көрсетіп отырған медициналық қызметі сапасының жоғары деңгейін растайды»,-делінген хабарламада.
Қазақстан Республикасының қолданыстағы заңнамасына сәйкес ағзаларды транспланттауды орындау үшін денсаулық сақтау субъектісі екі өлшемшартқа сәйкес келуі, яғни трансплантация бойынша лицензиясының болуы, трансплантация жүргізуге рұқсат етілген медициналық ұйымдардың тізбесіне енуі тиіс.
Бүкіл әлемде адамның донорлық ағзаларын ауыстырып салумен байланысты транспланттауды адамның донорлық ағзаларын транспланттау және олардың айналымы саласындағы қылмысқа жол бермеу мақсатында денсаулық сақтау саласындағы уәкілетті орган бақылайды.
Уәкілетті орган бекітетін Трансплантация жүргізуге рұқсат етілген медициналық ұйымдардың тізбесі мемлекеттің осы саладағы тікелей бақылауын айқындайды.
Қазіргі уақытта Денсаулық сақтау министрлігінің бастамасы бойынша прокуратура органдарымен бірлесіп республикамыздың 5 өңірінде 11 трансплантация орталығын тексеру жүргізілуде. Тексеру пациенттердің қауіпсіздігін қамтамасыз ету және Қазақстан Республикасының нормативтік құқықтық актілерінің талаптарын сақтау мақсатында бастамашылық етілді.
