АХАТ өз функцияларын ХҚО-ға бергеннен кейін коммерциялық қызмет көрсете ме

АЛМАТЫ. ҚазАқпарат- 1 шілдеден бастап АХАТ функциялары мемлекеттік корпорацияға беріледі. Бұл ретте тіркеу органдары коммерциялық қызмет көрсете ала ма? Бұл сауалға өңірлік коммуникациялар қызметінде Алматы қаласы бойынша «Азаматтарға арналған үкімет» мемлекеттік корпорациясы филиалы директорының орынбасары Әсем Болатбаекова толық жауап берді, деп хабарлайды ҚазАқпарат тілшісі.

«Бүгінде АХАТ бөлімшелерінің мамандары мемлекеттік қызметкер болып саналады, сондықтан олардың жас жұбайларға коммерциялық қызмет көрсетуге құқығы жоқ. Олардың міндеті - өтінішті қабылдау, тіркеу күнін белгілеу, тіркеуді жүргізу және құжат беру. Ал Азаматтарға арналған үкімет - коммерциялық қызмет көрсететін корпорация. Сондықтан бізге өткен қызметкерлер де нарыққа қатысушы болады. Бұл дегеніміз - олардың жас жұбайларға арналған нарықтағы барлық коммерциялық қызметтерді көрсете алатынын білдіреді», - деді спикер.

Осылайша, АХАТ қызметкерлері функциялары ХҚО-ға ауысқаннан кейін неке қию рәсіміне, фондық музыкалық сүйемелдеуге, фото және бейнетүсірілім орындарын интерьерлік ресімдеуге, некені жас жұбайлардың қалауына қарай шақырған жерлеріне барып тіркеу бойынша коммерциялық қызметтер көрсете алады.

Бұл жағдайда жас жұбайлар басқа компаниялардың немесе мемлекеттік корпорациялардың қызметтерін өздері таңдау құқығы бар. Бұл некені мемлекеттік тіркеуге әсер етпейді, ол өзгеріссіз қалады, ал салтанатты рәсім қызметі тек некеге тұрушылардың қалауы бойынша.

Спикердің айтуынша, Алматы қаласының АХАТ қызметкерлерінің 80% - дан астамы ХҚО филиалдарына ауысып, қолданыстағы Мемлекеттік қызметтерді көрсететін болады.

«Бизнес-процестер өзгермейді. Мұнда жаңа ақпараттық жүйе немесе жаңа қызмет енгізілмейді, мемлекеттік қызметтер стандарттары қолданыстағы, қызмет көрсету тәртібі мен мерзімдері бұрынғыдай болады. Ең бастысы, біз Әділет министрлігіне сүйенеміз. Оның артында бүгінгі күнге дейін берілген функциялар қалады. Бұл азаматтық хал актілерін тіркеуді әдіснамалық қамтамасыз ету және бақылау. Елдегі АХАЖ жұмысының жаңа кезеңін тек оң өзгерістер күтіледі», - деп атап өтті ол.

Мемлекеттік корпорацияның мәліметінше, жыл басынан бері АХАТ желісі бойынша Алматы ХҚО арқылы 33 377 қызмет көрсетілген.

«Тарифтерге келетін болсақ, АХАТ-та тегін әрі ақылай қызметтер бар. Мысалы, 1 шілдеден бастап некені тіркеу 3874 теңге, ал өзара келісім бойынша некені бұзу 7728 теңге болады. Тууды, өлімді тіркеу сияқты әлеуметтік маңызды қызметтер тегін»,- деді Әсем Болатбаекова.