Ахмадинежад: Иран ядролық қару жасамақ емес

АСТАНА. Қыркүйектің 23-і. ҚазАқпарат - Иран ядролық қару жасамақ емес. Ислам Республикасының Президенті Махмұд Ахмадинежад сәрсенбі күні Си-эн-эн телекомпаниясына берген сұхбатында осы ұстанымды тағы да жария етті, деп хабарлайды ИТАР-ТАСС агенттігі.

«Біз ядролық қаруға талпынып отырғанымыз жоқ. Біздің оған деген ықыласымыз жоқ», - деді Иран Президенті өз сөзінде

Ахмадинежад сондай-ақ, барлық мемлекеттердің қарусызданулары керек екенін атап көрсетті. Ол, АҚШ пен «сионистік мемлекет» Израильге ерекше назар аударды. «АҚШ пен сионистік мемлекеттік үкіметтері қарусызданулары керек, себебі әлемге Құрама Штаттар мен сионистік мемлекеттің қолындағы бомбалар да қауіп төндіріп отыр», - деді Иран басшысы.

Тегранға қатысты енгізілген санкциялар туралы мәселеге тоқталған Ахмадинежад, оларды пәрменді деп санамайтынын айтты. Оның айтуынша, ол санкциялар оның еліне «ешқандай зардап тигізіп отырған жоқ».

Иран президенті өз сұхбатында сондай-ақ, Израильдің және ол елдің премьері Биньямин Нетаньяхудың атына қатты сын айтты. Ахмадинежад Израиль үкіметінің басшысын «әйелдер мен балалар өлтіріп дәніккен қасапшы» деп атады.