"Ақ кент" тұрғын-үй кешенінде 2698 үлескер бар - Ахсель холдингінің президенті
АЛМАТЫ. Шілденің 16-сы. ҚазАқпарат /Ерлік Ержанұлы/ - Алматыдағы "Ақ кент" тұрғын үй кешеніндегі 2698 үлескердің 1,5 мыңы бүгін баспаналы болды.
Бұл жайлы компания басшылары бүгін Елбасының қатысуымен өткен пәтер кілтін табыс ету рәсімінде мәлім етті.
Ахсель холдингінің президенті Ахмет Хамди Аянның айтуынша,"Ақ кент" тұрғын-үй кешенінің жалпы алаңы - 44,2261 гектар. Ондағы құрылыс жұмыстары 2006 жылдың 4-ші тоқсанында басталды. Тапсырыс беруші - "Айт хаузинг комплекс" ЖШС. Жобалаушы - "Ахсел иншаат тааххют ве тиджерет" АҚ. Онда 9 қабатты, 72 пәтерлі 42 үй бар. Шілде айында 1436 пәтерде жалпы құрылыс жұмыстары бітті. Алдағы тамыз-қыркүйек айларында тағы 1248 пәтер әзір болады. Бастапқы кезде 2008 жылы пайдалануға беріледі деп жоспарланған тұрғын үй кешені әлемдік қаржылық экономикалық дағдарыс кезінде тоқтап қалған болатын. Сондықтан "Самұрық-Қазына" ұлттық әл-ауқат қоры" АҚ арқылы оған мемлекеттен 16,5 миллиард теңге қаржы бөлінді.
