Академия мен агенттік қазақ тілін оқыту орталығын ашып жатыр

АСТАНА. 4 мамыр. ҚазАқпарат - ҚР Президенті жанындағы Мемлекеттік басқару академиясында қазақ тілін оқыту орталығы құрылып жатыр. Бұл туралы бүгін Астанада өткен «Бір тіл - бір ел - бір тағдыр» тақырыбындағы «дөңгелек үстелде» академияның «Тілдер және аударма ісі» кафедрасының профессоры Назигүл Төленбергенова мәлім етті.

«Бұл үлкен бір орталық агенттік (ҚР Мемлекеттік қызмет істері - авт.) пен академия арасында жұмыс істейді. Ол мемлекеттік орталық болады. Негізгі бағыты - тілдік құзіреттілікті арттыру. Онда Қазақстанның кез келген азаматы тілдік құзіреттілігін жетілдіре алады. Орталық бірнеше оқыту бағыты бойынша қызмет етпек. Біріншісі - көпшілік алдында сөйлеуге үйрету, екіншісі - ресми стильде жазуды дамыту. Сондай-ақ біз қазақ тілінде жылдам оқып, үлкен мәтіннің ішінен қажетті ақпаратты алып шығу мәселесін ескеретін боламыз», - дейді Н. Төленбергенова.