Әкімшілік істер бойынша заңды күшіне енген сот актілерінің Жоғарғы Сотта қаралу тәртібі өзгерді
АСТАНА. ҚазАқпарат - Әкімшілік құқық бұзушылық туралы Қазақстан Республикасының Кодексіне енгізілген өзгерістердің бастыларының бірі - әкімшілік істер бойынша заңды күшіне енген сот актілерінің Жоғарғы Сотта қаралу тәртібінің өзгеруі. Бас прокуратураның әкімшілік істер бойынша сот актілерінің заңдылығын қадағалау бөлімінің бастығы А. Чорманов осылай мәлім етті.
Еске сала кетсек, 11 шілдеде Елбасы «Қазақстан Республикасының кейбір заңнамалық актілеріне оларды Қазақстан Республикасы Конституциясының нормаларына сәйкес келтіру мәселелері бойынша өзгерістер мен толықтырулар енгізу туралы» Заңына қол қойды. Заңнамаға көптеген өзгерістер енгізілген.
«Бұл өзгерістер Әкімшілік құқық бұзушылық туралы Қазақстан Республикасының Кодексіне де қатысты.
Басты жаңалықтардың бірі әкімшілік істер бойынша заңды күшіне енген сот актілерінің Жоғарғы Сотта қаралу тәртібі өзгерді», - дейді А. Чорманов.
Енді соттың қаулылары Жоғарғы Соттың төрағасы мен Жоғарғы Соттың мамандандырылған сот алқасының төрағасының бастамасымен қайта қаралуы мүмкін.
Бұл үшінәкiмшiлiк жауаптылыққа тартылған тұлға, жәбірленуші, олардың заңды өкілдері, қорғаушылары, заңды тұлғалардың өкілдері Жоғарғы Сотқа ұсыныс енгізу туралы өтінішхат беруге құқылы.
Мұндай құқық орталық мемлекеттік органдарға да берілген.
Ұсынуды енгізу туралы өтінішхат Әкімшілік кодекстің 848-бабында көзделген талаптарға сәйкес болуы тиіс.
Бұл ретте процеске қатысушылар міндетті түрде өтінішхаттарда мыналарды көрсетуі қажет:
- қабылданған қаулыны орындау адамдардың өмірі, денсаулығы үшін не Қазақстан Республикасының экономикасы мен қауіпсіздігі үшін орны толмас ауыр зардаптарға алып келуі мүмкін болатынын;
- қаулы адамдардың белгісіз тобының құқықтары мен заңды мүдделерін немесе өзге де жария мүдделерді бұзатынын;
- қаулы құқық нормаларын түсіндіруі мен қолдануында бірізділікті бұзатынын.
«Мұндай талаптар кассациялық наразылық келтіру туралы прокуратура органдарына берілетін өтінішхаттарда да көрсетілуі тиіс.
Аталған негіздер Әкімшілік кодекстің 851-бабының 5-бөлігіне сәйкес Жоғарғы Соттың заңды күшіне енген сот актілерін қайта қарау үшін ерекше жағдайлар болып табылады», - дейді қадағалау бөлімінің бастығы А. Чорманов.
Заңның талаптары 2017 жылғы 25 шілдеден бастап қолданысқа енгізіледі.
