Ақмарал Әлназарова Ташкентте ауруханаға түскен қарағандылық балаларға қатысты түсінік берді

— Осы жағдай бойынша бірден Қазақстанның Өзбекстандағы елшісі Ералы Тоғжановпен байланысқа шықтық. Балалардың денсаулық жағдайын біздің ведомство бақылауда ұстап тұр. Олардың алып жатқан ем-домы еліміздің хаттамасына сәйкес келеді. Қазір спортшылардың жағдайы тұрақты. Бүгін вице-министр онлайн режимде конференция өткізіп, әр баланың денсаулығына қатысты ақпарат алды, — деді Ақмарал Әлназарова Үкімет отырысынан кейін тілшілер сұрағына жауап бере отырып.

Оның айтуынша, дәл қазір жас спортшыларды Қазақстанға тасымалдау мәселесі көтеріліп жатқан жоқ.

— Бұл мәселесе көтерілсе, бұған дайынбыз. Осы ақпарат шыққан бойда, Шымкент қаласы мен Түркістан облысындағы ауруханаларда тиісті орын жасақталған еді. Қажет дәрі-дәрмек пен дәрігерлер де бар. Балалар тамақтан уланған. Бұған қатысты көрші елде қосымша зерттеу жүріп жатыр. Қазір балалардың өміріне ешқандай қауіп жоқ, — деді министр.

Бұған дейін хабарланғандай, Ташкентте өтіп жатқан Dostlik Cup 2026 халықаралық футбол фестиваліне қатысқан бірнеше жас футболшының денсаулығы күрт нашарлап, ауруханаға жатқызылды. Балалардың ата-аналары жаппай сырқаттануды спортшылар тұрған қонақүйдегі тамақтың сапасымен байланыстырады. 

2 қарашадағы мәліметке қарағанда ауруханаға түскен қазақстандық жас футболшылардың басым бөлігі елге қайтып жатыр. Соңғы мәліметке сәйкес, Өзбекстан астанасында 11 бала мен үш ата-ана дәрігерлердің бақылауында қалып, ем қабылдап жатыр.