Ақмола облысында 25 тонна бидай ұрлағандар ұсталды
Ақмола облыстық полиция департаменті қызметкерлері 25 тонна бидай ұрлығының жолын кесті, деп хабарлайды ҚазАқпарат Polisia.kz-ке сілтеме жасап.
Ұйымдасқан қылмысқа қарсы күрес басқармасының қызметкерлеріне жұмыс барысында Бұланды ауданының аумағында үлкен көлемде астық ұрланып жатқаны туралы ақпарат келіп түскен. Жедел уәкілдер бірден айналма және далалық жолдарды пысықтап, ауыл шаруашылығы өнімдерін тасымалдайтын жүргізушілерден ілеспе құжаттарды тексеруден бастады.
Нәтижесінде полицейлер тиісті құжаттарсыз 25 тонна бидай тасымалдаған КАМАЗ автокөлігін тоқтатты. Автокөлікті тексеру барысында құқық қорғау органдары 49 жастағы жүргізушіден тіркелмеген травматикалық қаруды анықтады.
Барлық мән-жайларды анықтау барысында жүк көлігі бар жүргізушіні жергілікті ЖШС-нің бірінің 36 жастағы агрономы жалдағаны белгілі болды, оны кейінірек полиция қызметкерлері анықтады. Ал ЖШС директоры кәсіпорында не болып жатқанын, ұрлық жасалғанын білмеген.
Аталған фактілерге қатысты полицейлер ҚР ҚК-нің 188-бабы (Ұрлық) бойынша сотқа дейінгі іс жүргізуді бастады. Сондай-ақ қаруды алып жүру фактісіне қатысты ҚР ҚК-нің 287-бабы (Қаруды, оқ-дәрілерді, жарылғыш заттар мен жарылғыш құрылғыларды заңсыз сатып алу, беру, өткізу, сақтау, тасымалдау немесе алып жүру) бойынша қылмыстық іс басталды.
Айта кету керек, Ақмола облысының полициясында егін жинау науқанына байланысты әрбір қылмыс ерекше бақылауда.
