Ақмола облысында ағаш өңдеу цехынан өрт шықты
КӨКШЕТАУ. ҚазАқпарат – Ақмола облысының Целиноград ауданындағы ағаш өңдеу цехынан өрт шықты, деп хабарлайды ҚазАқпарат тілшісі облыстық ТЖД баспасөз қызметіне сілтеме жасап.
Ведомствоның мәліметінше, өрт бүгін түнгі сағат 00:22 шамасында Қосшы аулында болған. Қазандықтан шыққан өрт, ағаш өңдеу және металл өнімдері цехынан шығып, 750 шаршы аумақты шарпыды.
Тілсіз жауды ауыздықтауға ТЖД жеке құрамынан 14 қызметкер және 2 техника, Нұр – Сұлтан қаласының ТЖД 14 қызметкер және 2 техника, Жергілікті атқарушы органдардан 2 адам және 1 техника, жедел жәрдем медициналық қызметінен 5 адам және 2 техника, ДП 6 қызметкер және 3 техника жұмылдырылды. Өрт сағат 02:35 ауыздықталып, 04:20 сөндірілді.
«Сол маңдағы жатаханада болған 29 адам (оның 4 бала) қауіпсіз жерге шығарылды. Мерт болғандар мен зардап шеккендер жоқ. Өрттің шығу себебі анықталып жатыр», - деп түсіндірді ведомстводан.
