Ақмола облысында бірінші болып дауыс берген мехнизаторға сыйлық берілді
КӨКШЕТАУ. ҚазАқпарат - Ақмола облысында бірінші болып дауыс берген мехнизатор сыйлыққа ие болды, деп хабарлайды ҚазАқпарат тілшісі.
Ақкөл ауданындағы Домбыралы ауылының тұрғыны Виталий Балунов жергілікті шаруашылықта мехнизатор болып еңбек етеді. Ол өзі тіркелген №125 сайлау учаскесіне таңғы сағат 06:45 барып, өз таңдауын жасады. Оған аталмыш сайлау учаскесінде естелік сыйлық тапсырылды.
Виталийдің айтуынша, ол сайлауға сыйлық алу үшін емес, өзінің азаматтық парызын орындау үшін барған.
«Сайлау – бұл еліміздің әр азаматының өміріндегі маңызды оқиға. Әр адам өзінің жарқын болашағы, еліміздің гүлденуі үшін дауыс беруі тиіс», - дейді механизатор.
Айта кетейік, бүгінгі таңда Ақмола облысында 722 сайлау учаскесі бар. Оның 697-сі ашық учаскелер. Облыстың азаматтық альянсынан және кәсіподақтардан 1005 байқаушы тіркеліп, жергілікті сайлау учаскелерінде жұмыстарын атқаруда. Бұдан бөлек, сайлауға қатысып жатқан бес партияның атынан 1723 өкіл байқаушы ретінде тіркелді. Сағат 10:00-ге дейінгі жағдай бойынша барлығы 52980 адам дауыс беріп үлгерген.
